新鞋落地份外醒神。騎士喺周四NBA常規賽，作客險勝紐約人90:87，錄得5連勝。今場表現最搶鏡嘅唔係貢獻19分兼12次助攻嘅勒邦占士，而係首次着個人戰鞋落場嘅後衞K艾榮。榮仔繼續獨食，但佢喺今場波攞到今季新高37分，包括完場前10秒嘅關鍵上籃，大家又吹獨男唔脹。
K艾榮對個人簽名鞋「KYRIE 1」即將上市，而佢亦喺作客紐約人呢場波着上新鞋出擊。唔知係教練布拉特戰術安排，定係一班隊友特登畀佢威吓，K艾榮經常有isolation機會，畀佢單打獨鬥。不過佢有貨交亦係事實，全場18射12中，據統計單係一對一進攻都攞咗12分。占士就冇你咁好氣交吓波好過，全場有12次助攻。
完場前關鍵上籃致勝
射到忘我嘅K艾榮，到完場前終於記得有助攻呢回事，剩番4分鐘時間左右交畀占士射個3分波，既係佢今場波第1次助攻，亦幫騎士喺關鍵階段反超前至86:85；之後榮仔再助攻畀占士入樽得分。
到完場十幾秒，成班騎士球員讓晒個左邊畀K艾榮玩，佢就梗係唔客氣，對住森柏同A史杜達米亞嘅夾擊，插吓花快到冇影咁左手上籃搞掂。輪到紐約人最後一擊，同K艾榮一樣係獨男一族嘅安東尼都想做英雄，唔理隊友有冇空位，面對勒邦占士都照樣射3分，結果唔入輸波。騎士5連勝之後戰績改善成10勝7負；至於紐約人就繼續沉淪，6連敗下只得4勝16負。
識睇，一定係睇足英台【英波Live】：
http://soccer.appledaily.com
http://bit.ly/engballlive