之前有啲親政府傳媒話，佔領區衞生好差，八方之前都唔信，但噚日睇見原本喺旺角佔領區嘅大老鼠，竟然喺金鐘佔領區出現，真係唔到八方唔信佔領區會引老鼠！話說田少噚日朝早同兩個建制派議員探望絕食學生，點知田少嘅行動，引咗喺旺角俾人趕走嘅鼠王芬有樣學樣衝落去！
被潤「政治演說已足夠」
其實鼠王芬衝落去都算，但佢好似驚死冇人知咁，大聲要求同休息緊嘅絕食學生對話，即刻俾附近村民批評佢嘈生晒。絕食咗90個鐘嘅黃之鋒，最後都俾鼠王芬嘈醒，佢出嚟同鼠王芬講，自己一直有醫生監察住健康狀況，唔使梁議員擔心，仲反問有建制派議員致電特首梁振英游說同學生對話，問鼠王芬會唔會咁做。
鼠王芬即刻話自己已經發咗短訊畀特首，不過唔肯講個短訊係幾時發，只係不斷重申個短訊內容係話上次學聯同政府公開對話形式唔理想，認為雙方要喺閉門嘅「友善環境」下溝通。之鋒BB梗係唔俾佢耍，講明對話要有傳媒監察，最後仲潤咗鼠王芬一句：「我相信政治演說已足夠，我都要返去休息喇。」
鼠王芬之後俾10幾個市民驅趕，大鬧佢 「做騷」， 有阿伯指住佢理論，又有學生話「你不如叫梁振英落嚟啦」。難為佢被人不斷指罵，仍然唔肯走，仲指摘大家唔友善，直至喺附近請願嘅大專學術界黑袍遊行隊殺到，先成功令梁美芬消失於黑袍中，八方幾驚隻鼠王芬唔肯走，萬一有人call食環捉鼠王，咪盞公務員難做！
李八方
mailto:[email protected]