雨傘運動遍地開花，年輕的一代站出來高呼：「我要真普選！」想不到港視開台劇《選戰》及《警界線》同樣貼近港人熱話。這邊廂廖啟智在《選戰》飾演振民黨主席宋漫山，與李心潔為選特首展開連場陰謀詭計；那邊廂智叔又與林嘉華在《警界線》中，上演難為正邪定分界的警賊關係，連場鬥智鬥力，下周殺入高潮，兩位主角為港視打第一仗演得過癮。
撰文：溫敏芝、何慧斯
深沉宋漫山 考起智叔
在娛樂圈打滾多年的廖啟智，拍過不少劇集，亦曾經奪得香港電影金像獎最佳男配角，演技實在毋庸置疑。最近智叔更肩負重任，他為港視演出的《警界線》和《選戰》，以一人一票的方式，被觀眾選出成為開台劇，為港視打響頭炮。當中因為《選戰》以選舉黑幕作故事骨幹，貼近目前港人的願望，結果瞬即成為城中熱話。
為角色自創小動作
智叔在劇中飾演老奸巨猾的宋漫山，有指智叔這角色是影射立法會主席曾鈺成，日前智叔於尖沙嘴受訪，為謎底揭盅，他說：「我哋呢個係創作劇，大家都係香港人，好自然將一啲政治心態代入咗套劇度，我哋完全撇除晒梗係唔得，始終講緊香港呢個社會，惟有盡量擺脫，希望喺意志上盡量冇畀人呢個感覺，以為我哋影射或者模仿緊邊個政治人物。」每當宋漫山決定某一件事，或者解決個難題，他都會不期然豎起拇指擺在唇邊沉思，智叔笑說：「我係一號宋漫山，呢個係一個好深思縝密嘅人，佢經常都喺度諗嘢，但係又唔想俾人知佢嘅表情，想喺身體語言上，勾起觀眾啲共鳴。
放下自己重新適應
面對兩齣擔正的開台劇，有否壓力？他輕鬆笑說：「壓力喺佢（王維基）身上，唔喺我身上，我拍晒，錢又袋咗，《選戰》係迎合時代脈搏嘅戲，𠵱家個個講緊選特首、普選，好有共鳴，貼近社會，亦可能心潔冇參與過香港嘅電視，形成吸引力。至於《警界線》係曲折離奇嘅戲，處理呢兩個角色唔係易事，我有幸參與其中，覺得自己演藝生命裏有一點火花。」
智叔表示每次拍劇都有新的考驗，他說：「對我嚟講，因為我已有咁多年工作經驗，去到香港電視新嘅平台，比我感覺煥然一新，喺我哋呢啲咁有經驗嘅人嚟講，要重新去適應工作節奏要求，唔容易㗎，我要擺低好多嘢，交替過程需要一啲智慧，亦需要一定耐性。」
王維基的劇集被讚製作認真，智叔即嘆說：「聽聞製作部好似解散咗，令人好遺憾，呢間公司畀我享受工作感覺，感受到製作人甚至crew，佢哋往往冇最好，只有越嚟越好，係一個動力。」問智叔喜歡哪一部開台劇？他坦言兩部劇都喜歡，市場反應會鍾意《選戰》先，觀眾借助劇集宣洩自己民主渴求。智叔更透露聽聞《選戰》與《警界線》都有season 2，劇本已有，只等王維基拍板。智叔指除劇本吸引外，薪酬也吸引，笑言自己是個市儈的人，暫時未想過退休。
場地提供：馬哥孛羅香港酒店
《警界線》破格 林嘉華激讚
入行40年，參與過多次電視風雲的林嘉華，今次再度披甲，以《警界線》為港視省靚開台招牌，近日因為雨傘運動，令社會出現了很多種不同聲音，警察與市民的關係陷入了前所未有的分歧，湊巧《警界線》的故事內容，與目前的環境雷同，不過林嘉華笑說：「就算你拍古裝劇，你要嵌乜都嵌得到，我覺得唔關事，呢樣嘢清晰咁畀大家知道，娛樂就係娛樂，環境就係環境，況且《警界線》係喺12年已經拍晒，基本上完全冇關係。」他續說：「呢套劇唔可以用常規諗法去睇，故事編排會令你意想不到，好似正邪對立位喺第一集已經全部睇晒、佢哋唔需要刻意鋪排，原來喺人性裏面有好多嘢，情義係可以冚晒一切，而呢個義可唔可以令兵去捉賊？原來係唔使，反而個賊仲等緊個兵返嚟身邊，總之睇完第一集，唔會唔追落去嘅劇集。」
爭取時間與太太相處
坊間盛傳《警》將會拍續集，林嘉華稱留待港視去安排，不過會否回巢？他哈哈笑說：「得閒無事都有同無綫啲舊朋友傾偈，未發生嘅嘢大家咪去諗，演戲已經成為我嘅職業，邊度有啱咪去邊度演，只要係好劇本我就會參與！」
今年不但是嘉華哥入行40年，同時亦是他與劉寶珍結婚30周年，談到相處之道，他笑說：「我熱愛工作、全程投入，但係如果我為咗工作要周圍走，對我太太好唔公平，所以我會帶埋佢一齊開工，一來可以多啲時間相處，二來佢又會照顧我，幫到我好多。」零緋聞的嘉華哥更笑說：「其實你問我有冇愛過對手，係一定要愛，你唔愛個對手，點樣做戲？我哋呢個行業係要喺最短時間同距離去建立感情，如果你唔愛對方，咪唔能夠掌握呢個技巧，咪唔能夠完成自己工作？」他續說：「嗰條『警界線』要劃分得好開，要同自己講演戲㗎咋，記住太太係我最愛嘅人，其實有好多嘢，『諗咗當做咗』就得㗎啦！」
場地提供：港威酒店Three On Canton
劉美君、張可頤 接棒玩中港情
智叔和嘉華哥主演的《警界線》將於下周四（11日）播映大結局，Pandora的真身將會揭盅，星期五將緊接播映張可頤和劉美君演出的《來生不做香港人》，故事講述飾姐姐的劉美君和妹妹的張可頤，小時候因為來港生活的問題而反目，雖然二人多年後重逢，不過因為生活背景的文化差異，令她們的關係再度緊張，出現不少嗌拗；與此同時，可頤與蘇燦良，劉美君、曾偉權和林利之間的感情問題，亦有為她們的生活帶來不少衝擊。
消息在官方網站公佈後，已經有不少網民討論，不少人對於張可頤、劉美君和蘇燦良的演出很有期待，甚至連劇名亦成話題，有人覺得維穩味極濃，但亦有人覺得看完劇集再下定論。
