聖誕就到，斷估你已經訂好機票、酒店，只等假期一到立即閃身出門。不過，任你再瀟灑，出門前都總要執行李，即使明明身經百戰出門過百次，有冇仲係遇上老問題：行李過多卻又總係帶漏嘢，好明顯，呢個亦係本人每次出差遇到的問題……
OK，助人自助，就在出門前，提提你亦提提自己一些執行李的tips，還邀請了 五星級酒店Ritz-的管家Igor教路，傳授秘技。
1) 咪心急，入篋前，先晒冷：好多時為貪快將行李直接放入篋，其實往往因快得慢，Igor建議：「先將所有計劃要帶的物件全部找出來，整齊放在枱或睡床上，可以一眼睇清楚有冇遺留，然後才逐一放入篋，更加有效率。」
2) 分layer，重放底：跟收拾背囊剛好相反，執篋時將較重較大件的物件放底，當行李箱直立時，箱內的重量較能平均分佈。
3) 備不時，外套、插頭，置頂：因應目的地，將較大機會於未到酒店前便會用到的物件放於頂層位置，以備不時之需。
4) 攝張紙，開篋好easy：呢招比較少人會用到，比較接近酒店管家standard的秘技，「我會在每一層之間都鋪一張薄薄的纖維紙，唔止美觀，亦方便開篋時可以逐層取出所需物件，亦比較整齊。」
5) 叠與捲，邊招好：對於衣物的處理方法，其實離不開兩招：一係叠，一係捲，咁用邊招好？兩招各有好處，叠者，無咁皺，但晒位；捲者，皺些少，但慳位，兼易處理。因此，如 tee 一類便服適合用捲；恤衫、長褲一類則用叠的較好。有關叠恤衫，亦有學問，去片，睇下Igor點叠吧。
記者、攝影：曾冠輝