呢幾日天氣咁凍，冇咩好做，走落灣仔同華哥打吓邊爐，食食吓見到老貝頭馬雷蒙，當然叫埋一齊，佢份人一向正派，玩波玩馬一向唔啱佢，但又唔等於佢唔留意喎，尤其佢知我有喺呢度寫吓嘢，所以一坐落就自動放料。
佢話其實一向有留意日本波，今日日聯煞科有場德島漩渦（圖）對大阪飛腳，雖然「大細」開到3.5球，但佢都話要「大」，問佢點解，佢話飛腳排頭位同第2位嘅浦和紅鑽同分，以得失球差領先緊，今日最後一輪比賽開紀錄後，為免被追，肯定會爭取入多幾球，咁就更加穩奪冠軍，「大」有兩倍應該好穩陣。
另外，今日有場西甲皇家馬德里對切爾達，角球中位數11.5球「大」有1.95倍亦建議唔好錯過，佢話皇馬連勝只識贏波，全隊都咁好狀態，而快翼加里夫巴利又鍾意落底線出波，見呢啲打法球員喺隊，最易有角球，加上切爾達狀態差連輸3場，一定俾皇馬撳住打，角球開「大」都正路，我諗諗吓都覺得佢有見地。
講完波又傾吓本地嘢，我問佢隊波高佬七呢排咩料，行行吓山又唔行，佢話高佬七哥覺得自己年紀大，始終已60幾喇，上山幫吓手，畀啲意見就冇咩問題，但要日日用真力射百幾球去訓練幾個門將，每日返到屋企都暈陀陀，所以兩邊都幫吓，得閒幫公民教甲組，南華有需要又上吓去。難得老貝冇怪佢又上又落，仲成日噓寒問暖，呢啲咁有人情味嘅老闆，𠵱家好少見㗎！
文：本地職業領隊
識睇，一定係睇足英台【英波Live】：
http://soccer.appledaily.com
http://bit.ly/engballlive