【本報訊】70、80後港人蒲點旺角家樂坊，市場盛傳大型時裝品牌H&M將租用商場地庫、地下及一樓做旗艦店，月租達900萬元，家樂坊逾百間小商戶正面臨逼遷。商戶透露近日接獲大業主恒隆地產通知，明年5月底前須遷出，慨嘆屬於港人的中小型商場已買少見少，大財團壟斷下，只容納以「賺人仔」為目標的連鎖店、名牌店。
記者：譚靜雯
在家樂坊售賣韓國時裝、化妝品及飾物的Jeffy入行近八年，每月都親身到韓國入貨。他指去年5月續租時，商場只願簽約1年，「其實嗰時都估可能冇得做，香港𠵱家呢啲商場買少見少，俾大財團壟斷晒，小商戶好難生存，我哋都係搵啖飯食啫」。
Jeffy指家樂坊客路包羅萬有，有OL、潮童、甚至自由行，「家樂都幾十年啦，我阿媽後生嗰陣都係行呢個商場，幫襯開嘅客都係唔想周街撞衫，所以鍾意嚟呢度買嘢。𠵱家冇咗，好多港人都話可惜」。他又稱，以前旺角瓊華、旺中及家樂坊都是小商戶的生存地方，「但𠵱家全部俾人逼走晒，遲早咪玩完囉，變晒H&M、UNIQLO，周街都係嗰啲嘢」。
他指會考慮搬到一街之隔的潮流特區繼續經營，但租金比現時貴約兩成，「睇過都要6萬蚊一個月，間舖可能得呢度一半，仲要唔係即刻有位，家樂啲小商戶被逼走後，個個都要搵位，租金可能再升」。他坦言，若未能覓得合適舖位，「都未必再做落去，可能打番工做sales」。
熟客：又冇咗個地方行街
在家樂坊經營逾10年、售賣日韓時裝的Emma指收到商場通知，明年5月底前要遷出，「唔係唔想做、或者冇錢交租，係連機會都唔畀你」。經營韓國時裝店的張小姐亦稱，家樂坊每年加租最少15至20%，部份更加30至35%，旺角沒有商場可容納小商戶，「旺角𠵱家得番潮流特區同兆萬，朗豪坊又容納唔到我哋」。她稱，熟客知道家樂坊將變天，感到好惋惜，「吓！又冇咗個地方行街啦，咁點算吖！」
家樂坊地庫現有多間食肆進駐，有租戶透露，不少食肆尚有兩年租約，但最近恒隆引用租約條款，指商場若要進行大裝修，只須提前半年通知，毋須賠償。該租戶批評恒隆趕絕小商戶，「以前啲商場話舊先要大裝修，裝修完會再招租，但恒隆未裝修已一早引入H&M。為咗一個品牌，趕絕所有小商戶。咁搞法，其他商場日後都可以裝修為名，趕人走啦」。恒隆地產發言人表示，不評論市場傳聞。
