唔係芬蘭先有聖誕節村嘅，玩LEGO啦！原來唔少香港人都鍾意砌冬季特別版LEGO，貪佢有聖誕老人、聖誕樹，仲有大屋陪住過節。今年新作就有「聖誕老人工作室」（Santa's Workshop），聖誕婆婆同可愛鹿車更係首度登場，就請將LEGO樹當聖誕卡派街坊嘅LEGO迷林子傑同大家介紹吓呢條聖誕村啦。
記者：童 傑
攝影：潘志恆、童 傑
現職攝影師的林子傑，由小學玩城堡LEGO，到今日玩超級英雄LEGO，儲了八百多個積木人仔，是個業餘LEGO迷。他覺得一年推出一次的「冬季村莊系列」（Winter Village）夠應節又抵玩，「系列有雪地小屋、白色屋頂等場景，都好少見，例如去年嘅『冬季市集』，裏面有旋轉木馬，親手DIY之後仲識自轉，配合前年嘅『聖誕大屋』佈置一番，直頭可以幻想自己住喺裏面。」
大家由細玩到大的LEGO，原來過往僅擁有小量的聖誕樹及聖誕老人模型，直至2009年才有首盒打正旗號的節日系列。第一盒叫「玩具商店」，內有大大棵聖誕樹，此後一年一盒。到了2012年的「聖誕大屋」，因為積木多達1,490件，相當抵玩，開始成為LEGO迷的心頭好，系列至今推出6款，其中4款經已絕版。
今年推出的「聖誕老人工作室」，裏面更有聖誕老婆整餅給老公食，「呢條村有鹿、有聖誕老人，甚至新出嘅聖誕婆婆，仲有旁邊嘅小精靈，都凸顯咗聖誕氣氛。」他又會親手製作LEGO聖誕樹給朋友，「好似眼前呢棵，咁嘅size好少見，較獨特。」他笑說，有些收到LEGO樹的好友，會被他的熱情感染，開始玩聖誕版LEGO， 而且越玩越沉迷。
香港警察殺入LEGO畀
中環的LEGO小店Bricks CaNal的老闆張銘豪（Michael）說，聖誕節玩LEGO一定要自己動手砌，自行加LED燈已經算小兒科，有人索性DIY耶穌誕生的馬槽，重演「聖誕」日。但點解LEGO會冇馬槽套裝呢？他解釋說LEGO不願牽涉爭議極大的宗教題材，「有人想買教堂，但官方冇出過，因為用乜教派嘅教堂做原型，都可能引起爭議。」宗教、軍事一類敏感主題，其實亦有其他公司推出，他說這類積木同樣可以融入LEGO的聖誕裝飾。如近日流行的「香港警察」人仔，就非官方製作。
