打工仔有汗出、無糧出最陰功，可惜呢個世界呢種無糧兼無良僱主不少，苟存嘅亞視，應該係典範，亞視員工11月份糧一直被拖，消息人士向八方講，最快要星期一先有聲氣，換言之，亞視好可能違反《僱傭條例》。
亞視股東、台灣旺旺集團主席蔡衍明，要求法庭委任獨立人士加入亞視董事局，並下令大股東黃炳均出售股份單案，預計星期一有裁決，八方聽聞大股東已經準備好支票出糧，不過最終係咪交畀員工，就要視乎案件嘅裁決結果，消息人士話，如果蔡衍明贏，張支票肯肯定唔會兌現，如果旺旺蔡輸官司，大股東先會出糧，不過即使有糧出，都係下星期一，即係12月8日嘅事，亞視好可能又犯例嘞。