【本報訊】中環摩天輪吸引力大得令摩天輪擁躉Apple昨不惜放同事飛機，放工後飛奔中環，孤身一人買票爭做首日乘客。坐過香港摩天輪後，她唱好這座與國金二期相形見「矮」的摩天輪。
Apple對摩天輪瘋狂，先後坐過London Eye，又特別到法國、台灣和日本等地坐摩天輪。摩天輪對Apple的吸引力在於它們的傳說，「Sweet啲就話摩天輪去到最高處時，距離天空最近，嗰時許願成真機會大啲」；另一方面則是悲慘愛情故事，「每逢摩天輪轉完一個圈，呢個世界上其中一對戀人就分咗手」。
昨晚坐過之後，Apple大讚比想像中好，「因為之前好多評論話（摩天輪）泊咗喺ifc隔籬，體積比較細，但上到去用俯瞰角度睇返夜景，我覺得都幾好」。唯一要批評的是車廂比較焗促，她希望營辦商改善通風。
乘客評價
林小姐 家長
「轉三個圈都好合理，唔好轉第四個就得啦，第四個都好悶㗎！入面開咗暖氣，又焗焗哋！」
Francis 攝影達人
「今晚上去拍片，影段360度。要喺上面影得靚，要等佢停頓時先影，不過小心玻璃反光。」
