【本報訊】旺角鳩嗚運動已持續多日，近日因涉嫌滋擾店舖而惹來非議。不過鳩嗚團友明言，鳩嗚運動是政府「煽動」出來的，「鳩嗚係最低消費，唔出嚟點對得住俾人扑頭嗰啲？」團友甚至揚言，鳩嗚運動起碼持續至聖誕。
多名警員混入團中
旺角鳩嗚團昨晚繼續，由晚上9時45分由西洋菜街和豉油街出發，逾百人向登打士街方向進發，沿途高呼「支持警察，保護春袋」，又參觀各大金舖，部份原本10時關門的店舖提早15分鐘關門。團友兩度到訪周大福，堵塞在店門外，在途經彌敦道亞皆老街交界時，警方一度封鎖馬路，防止有人佔據馬路。
現場約50名警員在附近戒備，部份人只穿便服，未有佩戴委任證。本報記者發現，由本周三開始，多名警員混入鳩嗚團中，與團友交談，有團友不虞有詐而「中伏」。
已多次參與鳩嗚團的Jenny，擔任行政工作，不滿人大決定，9.26學生衝入公民廣場時已在場，之後一直留守金鐘，希望透過鳩嗚團繼續向政府施壓，「我哋嘅心志唔會因為清場冇咗，我嚟響應689呼籲，嚟旺角鳩嗚吓，轉另一個形式，你一清場我哋全部過嚟鳩嗚，我哋打游擊，佢哋守得仲辛苦」。
她之前在山東街過馬路，被警察指是垃圾，令她很憤怒，「我明白人人都有情緒，但你公職人員有情緒唔係發喺我哋身上，𠵱家係邊個逼我哋出嚟？政府逼我哋對立，唔明佢哋（警察）點解為咗兩、三萬人工出賣尊嚴」 。
本身是大專生的Emily，特意來參與流動佔領，「出分力囉，佢清到個場，清唔到我哋個心，邊區要人我咪嚟，我唔認同警察亂打人，儍咩！黑社會呀？」她對於下一步行動感擔心，「冇辦法，除非十萬人出嚟，𠵱家熱情冷卻，不過總要有人堅持」 。
曾留守旺角的Rosanna，目擊周日晚及周一凌晨警察在金鐘打人，形容情況猶如屠殺，令她極度心痛，「我會繼續加入不合作運動，搞中資銀行，繼續鳩嗚，消耗佢警力，同佢對住去做，但我哋會智取，唔會損兵，唔好俾佢挑釁到」。不少團友表示，會繼續鳩嗚至聖誕節，以影響大商戶的營運，「鳩嗚已經係最低消費，唔出嚟點對得住俾人扑頭嗰啲？」