傑志聽日港超聯大戰太陽飛馬，隊長盧均宜噚日先「中頭獎」，座駕俾吹冧咗嘅大樹壓住車頭（圖），好在福大命大，咩事都冇。唔知好運會唔會帶埋畀球隊，延續聯賽跨季不敗紀錄呢？
傑志隊長盧均宜噚日一早喺fb（圖）貼文，相中佢架車俾棵冧樹壓住，好彩佢當時唔喺架車度，個人冇事仲識喺fb報平安：「慘呀！好在大命！」均宜噚日如常隨隊備戰聽日對飛馬，收操後仲識講笑︰「可能關個車牌（689）事，所以搞到咁衰！最後要報警，鋸咗棵樹先可以揸番架車出嚟。」
至於啱啱換咗新髮型嘅均宜又話，除咗架車之外，好耐冇俾警察查身份證嘅佢，一落街就俾人查，「可能電咗髮後，以為我係韓國仔啩，哈哈，今次真係要買番注六合彩，今期一定中硬。」不過，呢位30歲守衞有冇橫財運就仲未知，但足總噚日公佈港隊出戰第37屆省港盃嘅港隊20人大軍名單，就冇佢同埋林嘉緯、黃洋呢幾位常規主力份，而教練金判坤今次仲首次徵召咗天行元朗嘅鄭璟昊、南華陳肇鈞同流浪卓耀國等新丁入隊，估計係想藉今次賽事觀察一班年輕球員嘅表現，為接班做好準備。
識睇，一定係睇足英台【英波Live】：
http://soccer.appledaily.com
http://bit.ly/engballlive