順誠控股（531）喺八年嘅低位上上落落，食住美國樓市turnaround，照計今年應該可以keep到12厘高息，頂得住港股橫風橫雨。順誠主打嘅係實木家具，以歐美為核心市場，呢期再拓展祖國市場。
先睇數據，喺順誠6月半年結之後，美國7月新屋動工加15.7%，創上年11月以嚟高位，再喺8月，當地新屋平均售價，打破咗紀錄水平。再去到9月，新屋銷售517萬戶，亦都創咗2008年5月以嚟高位。睇到嘅係，順誠主打地區售樓成績理想，集團喺嚟緊下半年度，已經有着落。
食正酒店投資熱
再講，順誠家陣亦拓展酒店家具瓣數，集團兼且同全球領先酒店品牌加強聯繫，而之前講過嘅係，隨住祖國富起來，中產亦隨之增加，行內估計，有達6億人，所以，亦對旅遊同酒店需求大幅度提升，兼激發酒店投資熱。唔計祖國拓展條水，順誠單係食住酒店家具條水，做得好，會係另一個中線增長爆炸力。
咪扯咁遠，順誠單係今年上半年，已經現兜兜每股派息6仙，現價（1.01元）嘅息率回報，高達6厘。又當順誠下半年度盈利，只係keep住上半年度嘅4,220萬元水位，已經可以keep番每股末期息6仙，全年息率回報高達12厘。
順誠高息防風力特強，更何況，佢哋現價已經係潛到近八年海底價，實在殘到飛起。又順誠家陣PB得0.75倍，行家敏華（1999）上個月頭再發力，家陣股價貼近歷史高位，PB上到2.7倍，順誠PB係折讓咗74%。
買順誠，先買防風高息，再博中線食住酒店投資熱個勢，成績單大翻身，當翻半番到1.5元計數，到時，順誠息率仍然高達8厘，PB得1倍多少少，未有耐追到敏華。
錢雋
細價股專家
本欄逢周二、三、五刊出