A股喪炒，筆者有朋友喺上海中資證券行做策略師，佢喺微信度話，「現在最難是要克服心魔」。
佢喺美國讀咗MBA，又考咗CFA，都叫飽讀詩書，面對而家咁癲嘅市況，乜嘢投資理論都變成冇用武之地。佢好得戚咁話，「大戶不看基本面，我要克服多年培養的價值判斷跟他們，真的很不容易」，言下沾沾自喜。
呢幾年嚟來，內地真正嘅有錢佬其實唔會喺股市搵食，呢班土豪炒樓、炒地、炒礦，搞風搞雨，作風彪悍。佢哋終於肯走嚟股市，就算唔識睇基本因素又點話，乜嘢CFA都要行埋一邊喇。
2008年以後，阿爺狂印銀紙，M2餘額過百萬億元，啲錢之前只有好小部份流入股市，而多數流入樓市、信託產品。
一旦啲大戶將錢搬過來，動靜非同小可，用朋友嘅話來形容，「跟病毒傳染一樣」，可能仲有排升，直到爆為止。
內地經濟下滑，其實企業嘅基本因素正變得越來越差。但而家全行嘅分析師都要跪低，睇啲大戶風向搵食。朋友惟有向現實低頭，盡快忘記書本理論。佢仲怪自己讀書太多，轉軚太遲，搵少好多。
李可強