民主黨劉慧卿有個節目叫「議會內外」，民建聯元秋蔣麗芸亦抄橋，會喺網上主持暫定名為「蔣麗芸會客室」嘅節目，講明不談政治、齋談心事。元秋話佢已經買咗三部攝錄機，佢喺立法會嘅辦公室，亦準備好化身錄影室，只係差兩張凳就可以開台。
為咗打響頭炮，元秋諗住請佢黨主席譚耀宗同佢訴吓心聲，或者分享吓出身故事喎！咁啱工聯會黃國健路過，八方多口問吓佢，有冇心事可以同元秋分享？點知黃國健反問：「我有乜事同你（元秋）分享呀？」令元秋情何以堪呢？但此說亦無損元秋雅興，佢話遲吓會搵番卿姐做嘉賓。大家真係想睇就要等吓喇，事關元秋話最快明年初先開台。