今年邊件事令大家「倒抽一口涼氣」？雖然八方唔係大家「心入面條蟲」，但人大8.31「光明磊落」連落三閘封殺真普選，令到唔少人日日去「鳩嗚」。你估八方想「厚多士」，聖誕流流同大家「講呢啲」？一唔為意仲會被人屈係「左膠」！但冇辦法啦，當「榴槤乜乜乜」成為雅虎香港今年至熱搜潮語首位，八方不得不回顧今年潮語「hehe」一番，當然唔會學許Sir「recap in English」。
柯震東榜內唯一非政治新聞人物
可惜吖，榴槤哥冇憑住全城熱講嘅金句氣勢，殺入埋全年人物搜尋十大。今年三甲盡是年輕人天下，上過《時代》雜誌封面嘅黃之鋒，喺雨傘運動獨領風騷，成為今年人物搜尋之冠，力壓學聯孖寶、周永康同岑敖暉呢對Alexter。雅虎話之鋒嘅搜尋量喺9月底至11月間暴升400%，認真厲害。
狼英同囡囡齊昕都上榜，但曾po疑似自殘相兼鬧老母嘅齊昕更獲網民喜愛，排第四叻過老竇排第七。李偲嫣既然獲封BB，點會唔係焦點？絕食減肥愛selfie嘅佢排第五，高過第六位嘅林鄭月娥。《那些年》柯震東，被揭吸毒好陰功，卻成為呢個榜內唯一非政治新聞人物排第八。第九位係財委會前主席吳亮星，問那星點解要照耀？無非因為悲哀中人為作亂。
守住榜尾嘅係「4點鐘許Sir」，或者八方再重申，呢位就係今年雅虎香港十大港聞搜尋之首嘅「雨傘運動」進行期間，日日四點鐘，以粉紅粉紅趣緻的臉見記者嘅警察公共關係科總警司許鎮德！
李八方
mailto:[email protected]