金朝陽（878）喺銅鑼灣嘅金朝陽中心二期Midtown開業大半年，噚日正式開張，70歲嘅金朝陽主席傅金珠，都好耐未試過同埋一對仔女一齊現身，佢對仔女陳慶達與陳慧苓已經幫手打理公司超過10年，佢將來應該好放心交棒嘞。
Midtown引入多間食肆，包括英國名廚Jamie Oliver嘅意大利餐廳，呢位名廚噚日就冇到賀，不過主人家一樣好高興，傅金珠全程笑容滿面，仲掛住同賓客傾偈，當太子女陳慧苓致辭完畢，準備剪綵儀式，司儀叫極傅主席，佢都聽唔到呀，要職員行埋佢身邊叫佢先知道發生乜事。
陳慧苓1998年就加入金朝陽，出名talk得，應付傳媒十分自如，相對而言，佢細佬陳慶達就十分低調，唔講唔知已經喺金朝陽工作咗10年。
噚日有記者要求太子爺同媽媽合照一張，佢都推搪，話要等齊大家影大合照，不過佢好尊重媽媽，一影相就畀個中間位媽媽。