今個星期我聽到一句非常有道理嘅說話，係出自多蒙特教練高路普口中，呢位緊張大師對嗰啲無法接受球隊下滑嘅球迷講：「如果你只能夠接受成功，咁就不如去做拜仁慕尼黑嘅球迷啦，你一定會好開心。」諗諗吓，其實球迷同朋友一樣，真係有好多種。
真朋友要共患難
「勝利球迷」即係咩？相信大家都知，佢哋就好似一啲鍾意喺你成功時走過嚟識你嘅人一樣，可能佢哋唔係想搵你着數，但就係鍾意同成功嘅人做朋友。而當你成功時，佢哋可以同你稱兄道弟、以好姊妹相稱；但到你有事時，就未必會同你同步過冬嘞！
亦都有啲球迷啱啱相反，鍾意鋤強扶弱，覺得佢哋有性格好抵撐。如果套喺搵朋友上面，可以同你共患難、一齊捱嘅，應該先係可以一齊行得最遠嘅朋友吧？
所以，我覺得揀一隊值得你支持嘅球隊，係要睇埋佢哋嘅球迷。因為支持一隊球隊，佢哋嘅球迷就等於你嘅朋友。好似阿仙奴嘅球迷，除咗經歷過全季不敗之外，亦經過8年冇冠嘅日子，但係仍然支持球隊、領隊。佢哋有耐性，可以一齊經得起人生嘅大起大落，如果你嘅朋友都同阿仙奴球迷一樣，可以陪你走過人生起跌，真係要講一聲恭喜恭喜！
乘勇博小勝史篤城
阿仙奴（圖）早排有小低潮，但係連埋歐聯又連贏番3場，上場擊敗修咸頓相信可以大大提升球員信心。雖然球隊近3季作客都贏唔到史篤城，但係史篤城狀態一樣麻麻，已經連輸3場，主場對般尼都要全失3分，又點可以威脅兵工廠呢？不過，上場佢哋對曼聯證明咗唔係完全冇反擊之力，所以阿仙奴要大勝又唔係咁易，所以我估呢場兵工廠會小勝2:1。
LULU
不懂踢波愛睇波