可能因為時勢運氣，唔少球星都試過坐冷板，仲坐到冇晒希望，但有時天堂同地獄真係一線之差。只要肯堅持，機會係留畀做好準備嘅人，一場波、一次換人就可以由冷板變正選，就好似曼聯中場費蘭尼（圖）。
4個月前，費蘭尼被視曼聯嘅頭號瘀血，好多魔迷都想佢走人，唔好阻住個地球轉，仲紛紛話費蘭尼又高又慢，肯定唔啱雲高爾嘅踢法。的確喺季初，安達靴里拉、戴利白蘭特夾迪馬利亞嘅效果好好，加埋桑馬達同朗尼，曼聯中場齊晒腳，費蘭尼就如唔少魔迷所料咁做咗邊緣人。
但10月對西布朗場波，靴里拉受傷，加埋曼聯落後，費蘭尼下半場入替。呢個就係費蘭尼嘅轉機，佢亦把握得到，入場唔夠3分鐘就入波，幫球隊追平。雲高爾賽後直情話佢之前錯晒，隊波係需要費蘭尼呢種高大威猛嘅球員先啱。之後就風水輪流轉，費蘭尼場場正選，就算靴里拉復出後都要坐後備。費蘭尼用表現證明，佢喺夏天冇被賣走，呢個絕對係曼聯嘅幸運。對車路士凍結法比加斯，進攻可以轟炸對手禁區，防守等於打多個中堅，啱啱周二對史篤城又再入波。
喺唔少球迷眼中，費蘭尼絕對唔係悅目足球嘅代表，但要成績又要悅目，其實係好難，特別對於一支正在重建嘅球隊。費蘭尼就係一隻實用嘅棋子，負責平衡曼聯呢條對抗性不足嘅中場。
文：咖喱