陳小春、謝天華、朱永棠3位90年代出道的風火海成員，前晚難得合體，聯同余文樂、林曉峰等撐劉偉強導演新戲《青龍》在旺角舉行的首映禮。已各有家室的風火海三子，當年談媾女，如今傾湊女。小春與天華狀態依然弗，不過朱永棠發福了不少。
小春笑言若要問生育心得，最好是向天華請教，身邊好多朋友都生女，大家都說要跟小春對親家。小春自爆囝囝人仔細細已經鍾意外籍女：「最近聽太太（應采兒）講，囝囝返學右邊係鬼，左邊係中，佢揀咗右邊，但我唔鍾意鬼妹㗎嘛，阿仔贏咗我。」小春透露正努力想追生多個，將來兒子長大不想和父母分享事情，可以有手足傾訴。
陳冠希失聯
至於將為人父的天華談到即將出生的BB就一臉興奮，他透露太太預產期在農曆新年其間，有可能是馬B或羊B，未知性別：「我仔女都冇所謂，人生階段去到一半仲揀仔女咩，太太知道，但唔肯講，我靠估，不過佢曾經話阿哥睇住個妹會好啲，順天意啦！BB好動，郁得好犀利，我每日摸住太太個肚10幾次。太太話我一摸，BB就唔敢郁，我覺得好得意。」
此外，被台灣女友洪文安（Ann）狠飛的陳冠希（Edison）臨時甩底缺席首映，公關指Edison之前答應出席，但最後失去聯絡。當年因為鍾欣潼而與Edison發生撞膊事件的樂仔，坦言現在再與對方見面也不會尷尬，早前在東京街頭也碰過面，但僅打了個招呼並無交談。樂仔最近被傳與內地女星童菲因合作拍戲撻着，他說：「如果為電影宣傳而犧牲，我OK嘅！但我同佢拍咗一兩日戲，你哋自己估吓啦！」
採訪：譚倩宜
攝影：陳慧安
