國產手機品牌小米創辦人雷軍早排喺一個論壇豪言，未來5至10年將成為世界第一，即場俾蘋果副總裁Bruce Sewell寸佢講就容易，《福布斯》最新公佈2014年亞洲商業人物（Asia's 2014 Businessman of the Year），正正係由雷軍奪得，唔知佢會唔會覺得吐氣揚眉呢？
45歲嘅雷軍喺《福布斯》中國富豪榜排第8位，身家超過700億元，佢唔似阿里巴巴創辦人馬雲講得一口流利英語，亦甚少外遊，出名係工作狂。
佢接受《福布斯》訪問時重申，未來5年都冇計劃安排小米上市，目前最緊要專注發展：「如果我今日上市，每個人都會變得富有、會賣股票、買樓、買車、移民，咁我點樣營運間公司？」