恒基地產副主席李家傑搞嘅愛佑香港慈善基金會，希望喺聖誕節向約100個主要喺廣東省、患有先天性心臟病嘅內地孤兒同貧窮兒童送「聖誕禮物」，為佢哋免費進行心臟矯正手術，每個手術價值3萬蚊。基金除咗自己攞錢，仲透過聖誕野外定向活動同嘉年華籌款。
而擔任慈善基金義務總幹事嘅，竟然係前助理警務處長鄧厚江。噚日鄧sir就同傳媒介紹呢個喺本月21日舉行嘅「城市迷蹤」定向活動，接受學生同公司組隊參加，各組會到香港唔同地方蓋印。基金會之後仲會喺科學園舉辦嘉年華，希望集合2,500人砌出巨型聖誕樹，打破健力士世界紀錄。