「老變」效應已過得七七八八，加上臨近聖誕，大片BD開始陸續上場，上個禮拜尾出嘅《猿人爭霸戰：猩凶崛起》，就絕對值得捧場。雖然龍叔叔係天生動物狂，對哺乳類動物總有莫名好感，《導盲犬小Q》、《子貓物語》甚至《大白鯊》都係喜愛非常，但一直對馬騮狒狒存有偏見，細個去荔園都唔會買香蕉餵佢哋。所以上集上畫時，本身並無期待，點知聲畫上超有驚喜，特技同音效勁到無倫，全球更勁收四億幾美金，呢班馬騮嘅叫座力，絕不可少覷。
兩集《猿人》電影版，跟N年前嗰套玩平行宇宙嘅電視版，基本上全無關係，上集《猩凶革命》主線好簡單，主要講人類以猩猩作藥物實驗，最後搞到佢哋聰明晒，可同人類爭一日之長短。新一集《猩凶崛起》就承接上集十年後，「猿流感」已令超過十億人死亡，免疫嘅人類已經所剩無幾，而且資源將盡，故事中殘存喺三藩市嘅人類，想去水壩重啟水力發電系統，偏偏遇着過千隻進化過識講英文嘅陀地猿人。人類試圖以和平方式談判，猿人大佬凱撒居然好明事理，冇出禁制令、冇揮棍、冇狂射催淚水，仲幫佢哋修復發電系統，叻過特首多多聲，唔知仲以為睇緊猿人版《黑社會以和為貴》。當然，戲名叫得《爭霸戰》，當然唔會和平收場，就係因為一啲誤會，兩幫人馬大打出手，慘烈無比死傷無數，結局都幾悲壯。共存真係咁難？龍叔叔睇完後，欷歔嘅鬚根即時生番晒出嚟。
劇情唔似電視版咁玩科幻理論，純粹係簡單易明嘅各為其主劇情，觀眾可專心欣賞BD聲畫表現。儘管無「鴨毛屎」7.1.4聲效同IMAX畫面，但BD表現依然超晒班，由CG製作嘅猿人，表情同動作真到你唔信，群揪戲混戰大場面唔會覺得亂晒龍，起碼睇3D版唔似「老變」咁會有頭暈感覺。
包圍感強 如置身動物園
最明顯係森林內一大群猿人嘅吼叫聲，包圍感勁到好似置身動物園，班馬騮跳嚟跳去，都營造到出色嘅環迴音效，而且低頻相當有力，猩猩嘅憤怒唞氣聲，都表現到沉厚力量感，採用48kHz收錄嘅DTS-HD MA，原來都唔係流嘢，龍叔叔睇到好熱血，直頭狒狒上身咁猛拍手掌，好期待2016年上畫嘅第三集。
得利今次依舊推出幾個版本BD，鐵盒版賣$289唔算貴，連Bonus嘅3D孖碟版賣$249都叫OK，但奇怪係2D版不設單碟發售，要跟埋第一集嘅合輯嚟買，之前買過嘅會有啲尷尬囉，好彩合輯只賣$289，除開都係約百五蚊一隻，舊嗰隻惟有拎落信和地庫平放啦。
Profile：
簡介：幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
