繼永隆與建行亞洲，中銀香港（2388）近期亦全線分行職員換新制服，新制服紅配黑，明顯比以前灰沉沉嗰套醒神。據講，女裝上身與裙腳有兩個紅色三角形，融合咗中銀大廈嘅設計，呢套制服保暖透氣，四季皆宜，仲體現環保概念㖭喎。
中銀對上一次全線分行換制服已經係4年前，主要係想隔一段時間就換一換新形象，每套制服都要員工度身訂做。中銀噚日仲專登搵咗幾位靚仔靚女同事做模特兒，聞說相中呢位靚女係喺中銀嘅屯門分行任職，中銀喺屯門有8間分行，大家想見佢真人，行開不妨去打個白鴿轉。
中銀分銷網絡副總經理馮燕芬補充話，除咗新制服，8月推出嘅升級版手機銀行App有超過70萬個客戶下載，每日下載量繼續上升，嚟緊都會喺呢方面繼續發展。