公民黨今個星期六改選領導層，主席、黨魁、兩個副主席、司庫以及秘書長等職位均只得一人獲提名，而且都係原班人馬，如無意外換屆後，余若薇連任主席，梁家傑續任黨魁，陳淑莊同陳清僑續當副主席。
至於20個執委，當中11個係支部主席，早前已經選出，當中新界東支部主席改由楊岳橋接手，佢師傅湯家驊（Ronny）淡出黨領導層，唔再競逐執委。Ronny笑言「冇話淡唔淡出」，但覺得係時候交棒畀年輕人處理黨務。至於嚟緊兩場選舉，佢講明無意參選區議會，至於立法會，就仲未決定，不過佢意有所指話：「天下無不散的筵席，可以畀啲機會年輕人試吓。」