偉大嘅特首又教曉我哋金句，「是可忍，孰不可忍」，表面解釋係忍無可忍，不過睇番出處，係萬世師表孔子，怒罵季平子不依禮法，僭越天子威信，以下犯上。睇番偉大祖國習主席嘅講話，既冇否定佔領運動，仲希望港府要克制唔好有流血事件，不過特首縱容警方亂棍打人，邊個先係「是可忍，孰不可忍」，請自行判斷。
亂咁拋完書包，都係講番波。坐冷板凳對球員嚟講，古有麥馬拿文、保格迪，今有艾迪巴約，可以白支人工都算賞心樂事，不過有鬥心球員就真係「是可忍，孰不可忍」；普多斯基（圖）假假地都係德國世界盃冠軍成員，上季起已經失去阿仙奴正選位置，今季有阿歷斯山齊士同韋碧克兩位新兵踢輔鋒，令普多上陣時間更少。
雲格做咗幾十年人都唔識睇眉頭眼額，普多已經不滿，不過雲格連少少落場機會都唔畀佢，對西布朗全場坐冷板，對多蒙特唔係耶耶辛洛高有傷，普多都唔使旨意落場，最好笑係雲格睇中皇馬嘅德國防中基迪拉，仲話想阿仙奴一班德國兵幫手做說客，唔通雲格想普多見到基迪拉會話：「嚟阿仙奴啦，呢道啲冷板凳好好坐㗎。」
其實小弟唔止一次鬧雲格固執，其實阿仙奴真係冇位畀普多踢？其實面對對手死守，普多又有遠射腳頭，正係撕破悶局好方法。不過算啦，如果雲格聽人講，就唔會今時今日搞到咁嘅田地。
文：牽牛