在上星期四Prof J叫大家要留意隻東瀛遊（6882），結果表現不錯。哈哈，半新股，第一日係好有意義，因為佢係你唯一嘅線索，加上又要睇落佢哋嘅股權分佈，又要睇吓邊間行揸fit，再睇埋成交配唔配合，呢啲咪係Prof J蜻蜓投資法第一隻翼囉！
年尾新股熱又再嚟啦，繼中廣核電力（1816）招股令全城熱爆後，亞洲最大嘅綜合殯葬服務供應商富貴生命（1438），又緊接而嚟，喺今日起招股，Prof J在幾年前已開始講，澳門賭王亦一早已經入場！
富貴生命強攻亞洲
殯葬服務係屬於基本同埋係必需嘅嘢，由於亞洲各國城市文化同教育水平提高，對優質殯葬服務意識提高，都令殯葬服務水平同要求不斷上升。
家陣香港上市有規模嘅殯葬股唔多，呢次上市嘅富貴生命啱啱好填補咗投資者對具規模經營者嘅需求。富貴生命係亞洲最大嘅綜合殯葬服務供應商，按合約銷售額、收入同土地儲備計算都係亞洲最大。至2014年6月30日，集團嘅土地儲備達220萬平方米。
集團又係馬來西亞同新加坡市場嘅一哥，喺大馬同新加坡市場佔有率達31.1%同34.8%。
用合約銷售額計算，2013年喺馬來西亞整體預售殯葬服務市場嘅佔有率達56.3%，新加坡同印尼嘅預售殮葬服務市場佔有率，分別達78.6%同36.1%。以呢三年計來預售服務同產品嘅合約銷售額，按年複合年增長16.6%。
除咗進一步加強喺馬來西亞、新加坡同印尼有機性增長（organic growth），又會進攻其他亞洲國家，例如泰國曼谷發展墓園同骨灰龕設施，又話去越南、中國簽訂立諒解備忘錄，又收購緊印尼同埋附近嘅雅加達。
在新市場拓展，叫做為公司嘅發展帶嚟新增長點，先要諗一諗，上市後再追蹤！
徐燦傑
齊魯國際控股首席策略總監
本欄逢周四刊出