雖然今年香港怨氣沖天，毫不和諧、暴力滿瀉，但還有二十日便到聖誕，總希望香港人能夠再現笑顏、開心一下。記得從前維港兩邊燈飾璀璨，不少遊人影燈作樂，可惜近年越見失色，氣氛大不如前。為了幫助大家影靚相、贏大獎，今次特別請來兩位攝影師親自教路，分別利用不同道具與技巧，換個角度拍出艷麗燈飾，其中一位更大施水晶球魔法，讓平凡燈飾頓變夢幻世界。各位，準備偷師吧！
記者：韓繼聰
攝影：梁志永、楊錦文
周景成（Edward）攝影年資不長，只有兩年多的時間，不過因在網上偶然看到外國影友利用水晶球拍攝，於是把「水晶球大法」帶到香港發揚光大，更成立「水晶球攝影聯盟」，成員更達一千三百多位，他說：「其實用水晶球影過好多主題，效果夢幻又浪漫，影風景好靚，用嚟影聖誕燈飾更係非常適合。」
見到Edward一手拿着水晶球，一手拿着相機，以為很簡單，其實亦有竅門，「初玩可用變焦鏡，較易玩出唔同構圖，最好有埋微距，對焦會易啲。」至於水晶球，他說大多在外國訂購，價錢便宜，一百至三百元左右，視大小而定，香港部份文具精品店亦能找到。「將水晶球放喺鏡頭前面，其實就似一個超廣角魚眼鏡，影燈飾嗰陣就可以輕易影晒大範圍嘅影像。」他提醒，水晶球體積越小，吸光度越少，也較難對焦；體積較大相對容易拍攝，不過會有一定重量，一個直徑20mm的水晶球一般超過1kg。
因為光線折射，水晶球會上下倒置影像，感覺有如漂浮一般，感覺夢幻。「構圖有兩種基本玩法，一種係着眼喺水晶球內嘅影像，微距放大變形倒置的景物；二係用廣角鏡，用大光圈，影水晶球嘅同時又拍低四周嘅散景，做出對比，豐富構圖。」他又教路，前者須要準確對焦，宜用腳架輔助；後者可以手持，提高機動性，多玩不同構圖。看他即場示範的作品，廣角鏡明顯較適合影燈飾，因為散景令燈光更璀璨更夢幻。他又建議多用不同角度拍攝，例如低抄，「好似呢部OM-D E-M1有反芒，方便以唔同嘅角度拍攝。」
巧用薯片筒 輕鬆玩懸浮
雖然用水晶球影燈飾已經相當新穎有趣，但Edward還有其他法寶，他介紹說：「其中一個方法就係廢物利用，去除薯片筒嘅底部，然後喺透明頂蓋中間開個窿，再套入小型水晶球，咁就可以影出水晶球喺空中『懸浮』嘅效果。」就記者所見，作品的確更有趣，但就稍嫌薯片蓋的影像不夠清晰，若然換上更透明的膠片，效果會更理想，不過製作便會複雜得多。此外，他還有一款自製小道具，就是在厚膠片上開窿，把一塊小小的凸透鏡放在中間，同樣能夠做出倒置及廣角效果，但因弧度不及水晶球，折射角度自然沒那麼誇張。不過這兩個小道具都比帶大大個水晶球出街來得方便，不妨一試。
影人隔兩米 勿用閃光燈
璀璨燈飾若有美人相伴，當然更加浪漫，不過Edward作品大多以景為主，甚少人影，他解釋：「水晶球太wide，變形效果好犀利，影人未必啱，特別係近攝，個樣會拉闊變肥，有哈哈鏡效果。如果想影人，我建議人同水晶球最好有兩米距離，影半身或全身，變形效果較細，亦可融合燈飾環境。」他又提醒，影街外燈飾時應多用慢快門延長曝光時間，而不應用閃光燈補光，因為此舉會令水晶球「爆光」，而看不到球內的影像。若想親自跟Edward學影玩水晶球，現在可到東薈城拜師學藝。
聖誕奇幻水晶球攝影坊
日期：12月20、21、25及26日
時間：下午2時至3時
參加方法：即日起至12月26日期間，於東薈城名店倉以電子貨幣即日消費滿港幣500元或以上，即可登記參加。（額滿即止）
登記時間：上午10時至晚上10時
登記地點：東薈城名店倉地下客戶服務中心
重曝失焦 加倍璀璨
那邊廂，有人大玩水晶球；這邊廂，洪維晉（Billy）則單靠相機拍出美麗燈飾。Billy是香港著名婚紗攝影師，曾獲不少國際獎項，亦被香港一本婚禮雜誌選為2014年度10位創意攝影師之一。他說影燈飾最簡單的基本功，跟影其他相一樣，「構圖係最基本，同一個位置，你可以避開人群只影燈飾，用對稱或透視構圖已經可以好靚；又可以用慢快門影低流動嘅人群，增加熱鬧氣氛。」除了基本功，他當然也有小技巧分享，就是用「重曝」影出璀璨感，「唔少新相機都能玩重曝，好似OM-D E-M1就有呢個功能，影燈飾嗰陣，第一次按下快門可以故意失焦，令燈光鬆散，第二次按下快門，就可選擇影相同位置，又或影完全唔同嘅構圖，同第一張『散光』相結合，眩目效果能大大增強節日氣氛。」用E-M1玩重曝的好處是可以即時預覽影像，方便「就位」，不用估估吓。
慢快門再zoom out 「拉爆」燈飾
Billy又豈止得一招教大家，較少應用、能夠增強動感的「拉爆」也適合用來拍攝燈飾，「攝影經驗較淺嘅可能未必識，但『拉爆』係好簡單、但又好好玩嘅攝影技巧。簡單嚟講就係用慢快門，在釋放快門嘅同時zoom out，把靜態嘅燈光從相片中心拉向外面，做出放射嘅光軌。」他說玩「拉爆」一定要有腳架或一個相機固定點，因為動的只可是鏡頭，相機則不能動，否則光軌線條便會彎曲。他建議快門速度一般可設於1/6s或更慢，因為zoom的動作要在快門開啟時完成，即是快門速度越快動作就要越快，其間亦要保持均速，放射效果才會平滑。「其實重曝和拉爆兩項好似唔相關嘅技巧，大家都可以嘗試合併埋一齊玩，不過影前要多啲構思同想像，亦要多啲嘗試先會有好效果。
女生靠微觀 影出溫暖感
李彥儀（Babie）自認影相只屬初哥，卻因曾創辦文化攝影雜誌《Memo》而接觸不同攝影師、觀看不少作品，故此亦有一些自己愛用的簡單技巧。「嗰啲太深嘅技巧我真係唔太識，一般我都只係用P Mode，不過有一次一位攝影師教我可以透過調整色溫，簡單改變同提升一張相嘅氣氛，我覺得幾有效。」
她建議影聖誕燈飾可調高色溫值，以偏橙偏紅的顏色營造熱鬧感覺，同時也能與寒冷的天氣產生強烈對比。除此之外，「女生嘅觀察力一般較好，亦鍾愛影微距，大可多啲聚焦喺一啲有聖誕特色嘅小物或字句，可能會比影大範圍燈飾更有驚喜。」
