香港人搵食同搵股一樣，都好羊群心態。特別係見到米芝蓮呢三個字，真係打蛇餅排幾粒鐘都心甘命抵。最近就同一間米芝蓮推薦餐廳嘅老闆食飯，提到米芝蓮，佢即時嘆口長氣，仲話其實唔係咁簡單。
佢俾咗一篇《南早》嘅報道菲菲睇，題為「No cash for listings, Michelin Guide director says」。簡單講就係市場一直傳聞香港米芝蓮嘅星，其實係要畀錢買，而呢篇報道就係講米芝蓮官方否認云云。問返老闆，佢都話由於佢硬頸，所以最後餐廳頂盡都只係獲得「推薦」，而未能獲星。至於米芝蓮的收錢傳聞，既然官方否認，咪聽完得啖笑就算囉。
觀察過去幾年經驗，食肆摘星後被業主瘋狂加租，以「阿鴻小吃」為例，連續五年獲一星，結果由於頂唔住貴租，被逼將北角發迹店結業。北角店一執笠，今年就不幸被搣星。所以除非老闆可以肯定年年奪星，否則拎到星，其實有機有危。
另外，對上一篇專欄，於網上獲瘋傳，在此多謝讀者厚愛。我想補充一點，查實「荒謬疲勞」呢個概念，源於區家麟7月時一篇講「審謬疲勞」嘅文章，而個概念亦因此成為Common Sense，所以其實我所講嘅唔係講咩大道理。上次專登落墨，最終目的，只係希望提醒香港人，勿拋棄做人原有底線、原則；勿忘初衷。
Fifi
http://www.facebook.com/lovefrystock
本欄逢周二、四刊出