壹傳媒主席肥佬黎噚日應白鴿黨李永達邀請，接受噚日新開嘅網台「仙人掌」節目「高達會客室」訪問。肥佬黎開咪爆料，話早前喺金鐘被掟動物內臟後，有兩個男人成日跟住佢，明查暗訪後發現，原來有「夥計」靜雞雞請咗兩人暗中保護佢，但佢覺得無需要，「我咪叫佢哋走囉」。可憐兩位男保鑣，無緣收集內臟做串燒。
對於無理批評 「睬你都戇Ｘ」
肥佬黎話向來無請保鑣，噚日佢去探絕食中嘅黃之鋒，畀個抱抱對方時，都係獨來獨往。做節目主持嘅何俊仁就話，肥佬黎唯一嘅保鑣就係《東方日報》記者，「日日跟住佢影佢，佢哋真係最貼身」。肥佬黎話喎，如果有人要郁佢，請50個保鑣都無用，透露以前台灣《蘋果》爆咗黑幫新聞、寫字樓被打爛後，佢司機都問佢，可唔可以轉買防彈車，擔心佢俾人暗殺，佢反問：「我話冇咁又點呀？係咪要着埋避彈衣？」佢話做人若然咁驚青，仲使做人？
肥佬黎又提到，有人話佢知，黃毓民經常喺《東方日報》鬧佢，佢一向唔會理、唔會聽，「好似《東方》（呢）張報紙，我點會去睇呢？」佢話如果老婆仔女鬧佢，佢先會驚，對於無理批評，「我睬你都戇Ｘ啦！」同樣係節目主持嘅陶君行問到對毓民經常鬧佢有乜睇法時，肥佬黎初時話冇乜好評論，後來補充：「唔通我頭先樓下俾隻狗去吠，我上到嚟又猛話呢隻狗，話呢個冚家Ｘ隻狗吖，呢個仆街臭嘅、佢老母吖咁？好無謂囉，係隻狗嚟咋嘛！」
越講越起勁嘅佢，對於黃毓民同黃洋達都有唔少跟隨者，肥佬黎咁講：「陳雲都有人跟佢啦，呢個世界梗有人跟㗎，你黐呢，越容易跟，因為啲人，尤其黐黐哋嗰啲，係會有共鳴點。」
李八方
mailto:[email protected]