仲記得兩年前民主黨改選主席，劉慧卿突然喺最後關頭報名選主席，硬撼單仲偕，最後仲後來居上跑出，成為白鴿黨首位女揸Fit人嘛？唔經唔覺，卿姐原來已經做咗兩年主席，白鴿黨月中又改選咯，如果卿姐報名，相信好大機會連任。
噚日八方問過卿姐係咪爭冧莊？佢話自己仲未報名㗎，仲叫傳媒幫幫手，問吓黨友支唔支持佢連任，亦話想多啲年輕人同婦女參與黨領導嘅工作。講多無謂，行動最實際，卿姐講講吓見到單仲偕、即係上屆手下敗將路過，即刻熱情問對方，支唔支持自己再坐一會？單雞笑笑口話呀，冇意再同卿姐爭主席，在旁嘅卿姐聽到，一直笑咪咪。