「鼠王芬」係經民聯梁美芬（圖）行走政界嘅朵，本來鼠王芬對呢個朵，唔多受落㗎，但佢前排去完台灣睇選舉後，成個人豁然開朗晒，仲話唔再介意用呢個名行走江湖，一切多得民進黨陳菊。話說陳菊喺台灣成日被人笑佢似卡通人物「花師奶」，但佢唔單止冇唔開心，返過來用呢樣宣傳自己。就係陳菊呢個心態點醒咗鼠王芬，令佢明白佢之所以有呢個朵，係代表佢地區工作做得好喎。鼠王芬有此諗法，真係人都開心啲。
而佢噚日澄清，從冇發表過「鳩嗚如切肉殺父母」嘅言論，強調用「殺父母」作比喻嘅係日前同佢一齊開記者會嘅油尖旺區區議員莊永燦，並再警告「鳩嗚」行為或犯法。