無綫跟四大唱片自09年因版稅問題決裂反面後，大台近年力捧「自己友」星夢歌手，引起各大唱片公司不滿，繼東亞的楊千嬅、何韻詩、RubberBand等不續簽歌手約後，最近連跟無綫關係友好的英皇，都不甘被大台過橋抽板，容祖兒、古巨基、蔡卓妍約滿後都拉隊走，由於大卡士合約歌手相繼流失，大台日前宣佈開放《勁歌金曲》總選，冇約歌手只要出席都有獎，跪求歌手撐場。不過，本報收到消息，四大之首環球拒畀面無綫，拒絕再玩《勁歌》！
華納要睇檔期決定
環球歌手包括陳奕迅、李克勤、吳雨霏（Kary）、Mr.、孫耀威、藍奕邦、AGA等，如果環球繼續拒撐場，《勁歌》總選肯定失色不少，昨日本報致電環球助理總經理譚先生求證，他承認：「環球唔會參加《勁歌》頒獎禮，之前收到無綫邀請信出席《勁歌》第二回優秀選，今日已經回覆無綫唔參加，旗下所有歌手都唔出席，既然第一回優秀選參加咗都冇獎，汲取經驗後決定算數，唔係輸打贏要。」
今年6月舉行的《勁歌》優秀選第一回，環球的Kary和Mr.有份角逐，但賽果卻爆冷食白果，令雙方未能破冰，據知因無綫曾邀環球歌手譚詠麟和李克勤為世界盃節目唱主題曲，但要求擁有歌曲版權，惟版權屬於唱片公司財產，環球不同意無綫要求，令合作告吹，結果觸怒了大台，以食白果報復環球，難怪環球拒絕再玩《勁歌》，向大台還以顏色。至於同屬四大的華納則表示，會否出席頒獎禮視乎歌手檔期，暫時未決定。
除了四大外，據知許志安、薛凱琪、鄧麗欣等所屬的太陽娛樂亦有意唔玩《勁歌》，其唱片部總經理黎先生昨回覆：「好坦白，未知總選規則，所以呢刻未有決定，公司要開會傾，最主要睇歌手檔期先，檔期唔得唔使去。」
採訪：皓騫