英國猛將郭能呢晚先苦後甜，第四場搏輸完沈廐「大勇士」，第五場四班1200米贏番姚廐「永神駒」補數，全賴佢自己有一股打不死精神，後駒就喺咁嘅情況下，由佢爆12倍冷win，兼且幫姚本輝馬房連續第三次周中夜賽贏馬。
今場四班1200米賽事，大熱門順理成章係新勝同班同程、田北俊公子田啟文愛駒「赤壁武士」，上仗大勝三馬位，今仗熱至2.0倍，再配雷神大家都認為穩陣，點知表現卻走晒樣，沿途居中有遮擋靚位，但直路騎落一滴都冇，最終只跑第六，獨贏、位置彩池夾埋約1,500萬注碼輸晒，雷神重演日前「明多多」大熱倒灶歷史，跑馬就是這樣的！反觀今場閘前先後着綠燈落重飛之「永神駒」及「心花怒放」，飛到馬到，就咁包辦33倍綠燈Q，帶挈落飛黨執番一大筆，第三名係田泰安之「無敵城堡」；而楊千嬅奶奶黃淑貞之「野孩子」略勝「赤壁武士」跑第五。