上星期日賽馬，第一場由呂健威馬房嘅「紫電明珠」勝出，影拉頭馬威水相時吳嵩站在馬主旁，肥仔K問：「點解吳嵩會拉頭馬嘅？」普通嚟講，梗係馬主朋友啦，故此會企埋馬主身邊影相；但吳嵩在馬圈中有邊個唔識呀，又唔見佢成日影相？佢有個慣例嘅。只要係經佢之手介紹買入嘅馬，如果贏出而佢又在場嘅話，佢多數會同馬主一齊影相，譬如隻「好好計」（馬主係羅兵咸永道會計師事務所亞太區主席楊紹信及其他羅兵咸合夥人）在美國贏出一級泥地賽，創本港祝奏馬匹紀錄，吳嵩咪特登飛過去加州一齊湊熱鬧囉，隻馬係佢代馬主引入嘅嘛。吳嵩本來就係會計師出身，在澳洲讀完商學碩士，就加入Coopers & Lybrand（後來與羅兵咸合併），考獲澳洲會計師資格，故此佢與不少會計師馬主認識，楊紹信、何志強等知名會計師同佢比較熟絡。
有會計師平步青雲之路不走，吳嵩卻在1992年在將近30歲時毅然放棄會計師事業，隨自己個人興趣做事，從雪梨走返嚟香港從事講馬寫馬，係一個青年會計師好奇怪嘅決定，更奇怪嘅係佢爸爸（退休校長）唔阻止佢，唔醒佢兩巴掌，試問有幾多個退休校長肯眼光光睇住自己個仔有大行碧科會計師唔做，竟然選擇去馬場混混，靠寫稿、講馬討飯吃呀？
如是者22年過後，吳嵩已成為評馬人／育馬者／賽馬月刊社長／賽馬資訊供應商／馬主，足跡遍及歐美澳紐各大馬場，歐澳紐港賽馬盛事無不參與，有不少人即使唔抵得佢多口（因太識講嘢），話佢沙塵（因對賽馬資料背誦如流），都會佩服佢對賽馬事業之認識及全情投入。今年香港馬主協會在十一月尾舉行周年大會，選出新理事，在十二月一日理事會互選，選出吳嵩為2014/15年度馬主協會會長，為期一年，吳嵩話以後本着「非以役人，乃役於人」作為任內工作宗旨，繼續舉辦本港及海外活動以及透過馬主協會慈善基金惠澤社群。左丁山與吳嵩在1992年認識，由移居雪梨之新亞同學容啟輝介紹，料不到當年一位年輕人竟然會日後成為香港馬主協會會長。梁愛詩話唔放心20年後香港由今天之年輕人管治喎，鬼知道以後會發生乜嘢事吖，詩姑少擔心啦。