我求大俠前日個面書俾個MV洗板，仲以為唔係BIGBANG就係天堂鳥，點知竟然係一班A字頭保險公司嘅高層，扮鬼扮馬以Hip-hop形式拍MV，宣傳吓公司有幾威有幾勁，不過留言最常出現係4個字：搵食艱難。
唔好以為喺歐洲頂級球會踢波同做教練就好易搵食，意甲排第3位嘅拿玻里，就着晒《戰狼300》嘅裝束，影2015年球會官方月曆相，睇佢哋半裸show肌，都係畀番4個字佢哋：搵食艱難。
化妝show肌頂硬上
拿玻里周一作客1:1逼和森多利亞，搶番個意甲第3位，不過點都唔夠球會周二發佈嘅短片咁吸引，條片就講拿玻里一眾職球員去studio拍攝，準備下年官方月曆用。一般球會月曆都不外乎着波衫的吓波，或者着便服晒型仔，有啲球會仲慳皮到就咁搵比賽相頂檔。拿玻里就好有誠意，以類似電影《戰狼300》嘅造型拍攝，仲幫球員化行妝，同好性感嘅短打，順便show埋肌肉，淨係男仔當然好寡，球會仲搵咗幾個索女陪襯吓㖭。
力撐集齊時尚幽默性感
拿玻里嘅公關團隊就形容，月曆相將集合時尚、幽默同性感於一身，球迷都好心急睇吓，不過暫時都只係流出兩張相，一張係球隊3大主力希古恩、咸錫同荷西卡利祖，加上索女模嘅合照，特別中場咸錫憂鬱嘅眼光，加上強壯嘅肌肉，真係殺死好多女球迷。
另一張就係教練賓尼迪斯，不過賓帥步向中年發福，要佢半裸既辛苦佢又辛苦球迷，所以都畀番件背心佢着，係咁意揸住戰術板指揮大軍。
大家係唔係好心急想買呢？月曆就會係18號開始喺拿玻里官網發售，售價仲未公佈，不過以2014年月曆都係賣12歐元，應該唔會太貴，係球迷就要支持吓，不過男球迷掛喺屋企就要小心啲，擔心被誤會性傾向就唔好啦。
識睇，一定係睇足英台【英波Live】：
http://soccer.appledaily.com
http://bit.ly/engballlive