呢日(12月3日)係容天鵬56歲牛一大日子，首先祝爆鵬哥生日快樂！呢位從練第二季之廐主，撞正生日有夜馬跑，佢向自己送上最佳賀禮，第二場五班1650米勝出「天弓」慶祝，喜歡扮靚之容太，更化身迷人pink lady，一身粉紅衫在黑夜中搶晒鏡。此駒之前一直跑田草贏唔到，不過近三場順序拎到四、三、二名，明顯已經企喺勝利邊緣，果然呢鋪一轉谷草短直路，騎師柏寶以率先發難走甩之策略一錘定音，取得服役第一W，馬房部署可謂功不可沒，二、三名分別係冷門「升力」同大熱門「軍號」。當中「升力」12檔出閘，拉士姍姍來遲輸四分三馬位得第二，跑到第三季依然未開齋。
賽後容天鵬指出，「天弓」的足部時有問題，呢晚臨埸有雨場地鬆軟，正合此類腳患馬發揮。容天鵬話好感謝馬主有耐性，其實「天弓」沙田亦合，只要場地鬆軟就可發揮出水準。
值得一提，容廐近兩Win分別由「帝聖好好」及「天弓」由沙田轉谷草取得，想追此廐馬買，不妨向呢條攤路動腦筋。