港股成交破千億，A股成交撲萬億，相信大家對相關數字已經麻木。面對突如其來大成交，一心諗住提早收爐嘅老散，肯定手足無措。查實唐牛上月底已經放軟手腳，保留實力下年再搏殺，但全因三樣事情/諗法，轉身瘋狂撲向中資股，趁今日冇心水推介，同大家分享一下。
1）A股大成交破位。睇番上星期五，滬綜指企穩2600點，兩市成交更超過6,000億元，雖然當日放假郊遊中，都忍唔住call經紀掃入一籃子中資股。都係嗰句，A股衰足咁多年，突然出現盛況，以內地散戶乜都盲搶嘅性格，升市肯定唔會一日貨仔咁少，事後亦證明正確。
2）好天斬埋落雨柴。大家試想下今年靠炒乜贏錢？不外乎年初嘅科網潮，以及下半年嘅殼股潮，其餘時間，好聽啲就係休養生息，難聽啲就係食穀種。事實上，港股炒作概念越嚟越少，但炒起上嚟就越嚟越瘋狂，靠兩三個概念賺全年嘅錢，已經成為新常態，難得中字頭有勢，一於清兵上身，衝！
3）勿被calender year概念綁死。呢樣唐牛正在學習中，正常人都會以年度去計回報，所以先會有January effect，五窮六絕七翻身等terms嘅出現，但股市其實長開，任何一刻都可以有投資機會，你可能會話，咁咪要長期作戰？好辛苦喎。事實係，睇住人哋贏錢自己冇份仲辛苦囉。
唐牛
https://www.facebook.com/tongcow88