香港有錢家族嘅富二、三代，近年除咗加入家族企業，逐步接棒之外，亦各有新搞作，有人推動藝術創作、有人幫助基層學生、有人推動某類運動發展，可謂各適其適。新近信和置業（083）太子爺黃永光就搞大廈水力發電，搞環保！信和噚日宣佈，跟理大同奧雅納顧問進行首個大廈水力發電系統研究，透過回收本應流失嘅大廈水用作水力發電。呢個水力發電裝置安裝喺奧海城2期，每粒鐘可以產電100W。系統足以應付一般電梯大堂嘅照明系統。假設一個電梯大堂安裝15個LED燈膽，每個耗電量係6.5W，相等於每年省電費1,281元。