造紙大王李運強家族，旗下有多匹高質素之「包裝」系馬匹，其中「包裝鬥士」及「包裝博士」，剛於本周二沙田馬場試閘，「包裝鬥士」於第八組1600米草閘中，沿途守好位，末段在杜滿萊胯下交出強勁走勢，擊敗香港瓶參戰馬「威風猛將」勝出。而「包裝博士」就喺第九組路程嫌短之1200米泥閘，後追凌厲殺入一席第二。
練馬師孫達志講過，好希望「包裝鬥士」進軍香港一哩錦標，不過最終隻馬冇爭分跑國際賽，李運強兒子李文斌說︰「『包裝鬥士』有一個特點，就是出頭後會自行收慢，末段一定要步步催迫，上仗跑婦女銀袋賽，杜滿萊已力騎該駒，我們不太想牠太辛苦，所以安排馬兒小休，冇喺國際賽之前跑多一場爭分角逐香港一哩錦標，坦白講牠暫時只有三級賽實力，若然跑國際賽面對『步步友』，恐怕落於下風。孫達志指『包裝鬥士』今課試閘走勢好好，將於12月14日二班1600米上陣，希望再有好表現。」
至於被喻為大超班馬之姚廐新星「包裝奔馳」，上月23日賽事因贏馬拍檔郭能造不到磅，易配杜滿萊，據知當日如順利取勝，今後該駒帥權將長交杜滿萊打理，但焉知當日杜滿萊發揮平平，慢閘兼沒有及早發力，姍姍來遲僅敗，1.3倍大熱倒灶屈居亞軍，搞到李運強嬲嬲哋。李文斌首次正式透露，「包裝奔馳」將飛起杜滿萊，12月14日爭三班1400米應會回配郭能。