乜嘢係父愛？富豪（078）主席羅旭瑞就做咗個完美示範。為慶祝寶貝女羅寶文（Poman）成為世界十大傑青，兼且成立慈善基金，羅旭瑞噚日公開大展歌喉，以一曲《What A Wonderful World》當禮物送畀Poman，令現場溫馨指數爆燈！
羅旭瑞噚日嚟一招鐵漢柔情，父女同場再合唱一首《You Raise Me Up》，羅旭瑞歌喉原來唔錯。
Poman係香港唯一一位三料傑青，即係包攬「香港傑出學生」、「香港十大傑出青年」同「世界十大傑出青年」，亦係香港首位獲得世界傑青嘅女性。噚日佢上台致辭時，忍唔住淚盈滿眶，話自己非常之感恩，因為由細到大，身邊都好多愛錫佢嘅人，包括家人、朋友、同事等等。
佢透露，細路仔時已經發白日夢，幻想做英雄，但後尾先發覺，英雄唔係要識擋子彈，而係要造福社會，又話從商都可以貢獻社會，所以就成立一個以愛犬命名嘅「寶狄慈善基金」，希望幫到小朋友實現夢想啦！