A股炒到癲咗，每日成交金額連同孖展餘額，喺最近一個月內都大幅飆升，就嚟雙雙突破萬億元人民幣大關。
其實個市如果係由孖展推上去，一旦跌番落來，就會出現斬倉潮，到時人踩人好恐怖。不過，見慣風浪嘅內地股民冇有怕，唔少大戶仲覺得孖展唔夠喉。
內地傳媒報道，近期一種叫「傘形信託」嘅基金非常好賣，只賣畀有300萬元資金以上嘅的大戶，槓桿比例可以去到三倍，買100萬元可以借300萬元，等於有400萬元資金入場。
現時內地證券行孖展保證金比例一般要求60%，戶口要有60萬元先可以買100萬元嘅貨，槓桿比例不到一倍。
啲大戶之前炒地產、鋼貿，見慣大上大落，自然覺得唔過癮。另一方面，孖展既可以賺息又可以賺佣，證券行近期開始催谷，之前孖展開戶要有50萬元，現時唔少行已經將門檻降到10萬蚊。
內地人買嘢鍾意一窩蜂，睇目前情勢，孖展客只會越嚟越多，直到買爆為止。當然，唔少內地股民相信，目前離爆煲恐怕仲有一段距離，皆因到阿爺仲未出聲叫停。在此之前，一於借爆佢入市，才能盡興。
李可強