泛民議員喺呢個立法會會期復會後突襲成功，喺財委會轄下工務、人事編制兩個小組委員會佔有決定性過半人數，建制派呻笨之餘唔服氣，要求重新加入。
人事編制小組委員會噚日召開特別會議，討論18名建制議員提出逾期加入申請，由於保險界陳健波講到明，唔會再參與任何相關特別委員會解釋、亦冇資料補充，所以主席梁繼昌隨即進行表決，否決佢加入，餘下17名議員，就要了解佢哋仲有冇補充資料後再進行表決。民建聯黃定光就鬧梁耍花招，恫言「山水有相逢」，陳健波就話等小組否決晒建制加入後，建制派會商討下一步，包括喺建制佔多數嘅財委會再次提出加入，密謀翻盤。