紐約人同網隊兩支來自紐約市嘅NBA球隊，下年合辦明星賽，但唔代表兩軍好和諧。周二紐約市打吡，紐約人喺麥迪遜公園球場（MSG）主場出擊，保安就抬走網隊嘅傷殘死忠球迷Jeffrey Gamblero，加深咗兩軍牙齒印；好彩網隊以98:93贏波（右圖），叫做幫Jeffrey出啖氣啦。
左腳傷殘裝上義肢嘅Jeffrey，一直係網隊死忠球迷，自製44號球衣，加上喼帽同黑超嘅指定造型，不時喺看台又跳又叫咁打氣；喺網隊嘅巴克萊中心球場，基本上冇人唔識。點知周二佢去到紐約人地頭MSG，一如以往幫網隊打氣嗰陣，唔知係咪紐約人開局已經處於劣勢，身邊嘅主隊球迷唔順超，向保安投訴Jeffrey聲浪過大。保安起初勸Jeffrey收聲，不過睇波冇得打氣，就好似落旺角冇得鳩嗚，Jeffrey梗係唔就範，之後仲除咗自己隻義肢以示抗議（圖），最後幾位保安抬走佢，仲大力掟佢落地下㖭。
網隊98:93贏打吡
網隊球迷當然聲討，但紐約人仲出聲明，話有球迷因為難以控制先趕佢離場，以後都禁佢入MSG。網隊後衞阿倫安達臣就撐Jeffrey，話佢係球隊長期擁躉，趕佢走真係難以置信。點都好，網隊憑中鋒B盧比斯攞23分同祖莊遜攞22分，以98:93擊敗紐約人。
識睇，一定係睇足英台【英波Live】：
http://soccer.appledaily.com
http://bit.ly/engballlive