即將招股嘅內地火鍋連鎖店呷哺呷哺餐飲（520）噚日舉行投資者推介，老闆賀光啟面圓圓、油光滿面，好配合做餐飲呢行，最過癮係佢嘅髮型，驟眼睇有幾分似「天線得得B」！
呢間公司個名跟老闆髮型一樣有趣，呷哺呷哺（XiabuXiabu）本身係普通話讀音，似日式火鍋Shabu Shabu，廣東話音係「頰部頰部」。不過呢間公司其實係主打台式火鍋，喺內地有超過400間分店，香港暫時冇分店。
呷哺上市編號520亦有古仔㗎，就咁睇似係用普通話講「我愛你」，呷哺又確係由夫妻檔打理，老闆賀光啟係主席，太太陳素英只擔任非執董。根據招股書，陳素英自呷哺2008年成立以來，一直負責研發調味料同麻辣湯底。不過公司話，呢個冧巴只係想表達公司全心全意服務消費者嘅理念喎。