向來在A股冇人吼嘅內銀，股價呢幾日突然起飛，唔少中小行日日升停板，成為升市火車頭。
有內地消息話，有太子黨背景嘅安邦保險入市掃內銀，等於阿爺吹雞，吸引各路人馬放心入市。無論消息真定假，以安邦保險買嘢嘅往績，似乎值得參詳吓。
安邦現任董事長，為鄧小平外孫女婿吳小暉。股東陣容包括中共開國元帥陳毅之子陳小魯、前總理朱鎔基之子朱雲來、博鰲亞洲論壇秘書長龍永圖等一眾猛人。
另有消息指，安邦保險關聯公司與前總理溫家寶的兒子溫雲松有業務往來。
佢喺2004年成立時，只有5億元（人民幣．下同）註冊資本，至今已暴增逾千倍至6,000億元。安邦喺去年12月，以136億元豪掃招行A股，買入價12.07元比市價仲高10.7%。其後招行股價浮浮沉沉，到11月先打和，至今微賺5%。喺11月28日，民行公佈，安邦A股股權已達到5%需披露水平，以市值計，價值超過135億元。
即係話，安邦呢排一直在加碼掃內銀股。最近內銀不斷有好消息，又有存保制，又有利率自由化，呢班太子黨掃定貨，令人難以相信係巧合。
李可強