「日日去鳩嗚 我謝絕你監管；遇着李偲嫣 我未食嘔兩碗……」相信大家近日不停哼住呢首神曲。唔知日日俾人「唱」嘅私煙bb，有冇被唱到「是可忍，孰不可忍」？查實八方覺得，私煙bb都幾體貼吖，為免出現歌詞描述嘅情況，噚日喺特首辦請願前，專登照鏡補妝扮到靚靚先登場，繼而嘟住嘴一副冧樣呵狼英，唔知狼太會唔會睇到眼擎擎？
自爆絕食後瘦咗30磅喎
李偲嫣噚日朝早同佢嘅正義聯盟成員去行會請願，要求徹查佔中兼撐警。一到政總，佢就捉實送佢到請願區嘅警察selfie一番；而喺等狼英出嚟接請願信前，佢更加攞出鏡盒，搽唇膏照鏡補妝，似乎好想以最「靚」姿態示人。
喺終於等到狼英出嚟接信嗰一刻，私煙bb不知幾咁冧；搽完唇膏嘅佢，嘟住嘴交請願信之餘，仲拍拍狼英嘅膊頭，情深款款鼓勵佢：「迎難而上」，差在未獻吻㗎咋！見私煙bb對狼英咁癡心，點估到原來今次只係佢哋第三次相遇？私煙bb話喎，覺得狼英瘦咗呀，「比起我喺年初見佢真人時仲瘦，可能因為工作好吃力」，肉緊到呢！
有絕食經驗嘅佢仲話呀，絕食真係好辛苦㗎，自爆因此有後遺症，「大家睇到我之後呢5個月內，冇咗30磅囉，因為可能啲腸胃上有啲損傷啊」。啊喲，咁陰功豬呀，有冇人呵番佢呀？
李八方
mailto:[email protected]