上個月「男神」碧咸（咸爺）被網民影到現身荔枝角，仲上埋由老友樂裕民（Bruce Rockowitz）打骰嘅利標（787）公司，引來全城哄動兼集郵。其實早喺今年初，市場已經盛傳利標會簽約咸爺，幫佢推出以佢個名命名嘅自家休閒時裝。利標噚日忽然廣發邀請函，話今日喺ICC麗嘉酒店有新嘢宣佈喎，仲預告有「特別嘉賓」（VIP）㖭！唔通咸爺又會現身香江？
其實利標以前都有幫名人推出個人品牌嘅紀錄，例如早年曾經幫Jennifer Lopez出衫。Bruce與咸爺向來老友鬼鬼，就連早排Bruce嘅嬌妻、歌手李玟（CoCo）參與音樂頒獎禮，都大面子到請到咸爺做頒獎嘉賓。如果咸爺真係一如市場預期今日現身記招，相信又會逼爆會場喇！喺附近返工嘅集郵黨要留意喇。