自由黨青年團噚晚搞聖誕聯歡晚宴，除咗三位榮譽主席田北俊、周梁淑怡同劉健儀捧場，就連原本要去歌星蘇永康大婚嘅港視主席王維基，都專登抽空現身撐場，非常受青年團歡迎。
魔童呢次真係畀足面田少，一到埗就大讚田少係佢偶像，事關田少「敢講真心說話」。至於《選戰》裏面有冇田少事迹？魔童實牙實齒話《選戰》冇影射任何人！講起《選戰》，佢仲話收到唔少人意見，所以考慮緊幫呢齣劇出碟。
無政協一身輕嘅田少現身之餘，仲贊助一大支紅酒。而噚晚第一首娛賓嘅歌曲，係《欲言又止》，唔通代表田少訴心聲？最後田少俾青年團拉上台合唱《海闊天空》，仲同張燊悅，即係楊哲安老婆合唱《無言的結局》。