建聯集團（385）喺漢國（160）系統內，市值最細奀，又係最底層一隻，博變身，建聯有得諗。
建聯一門三傑，包括漢國（160）、建業實業（216）以及建聯。整個系嘅控股方式，由漢國上而下，最底嘅係建聯。又掌舵王世榮本身或透過建業，一共揸咗聯建73.3%權益，去到幾乎爆燈水位，而家陣建聯市值得4億元多少少，本身已經係成系裏面最細奀一隻（其餘漢國市值19.4億元、建業7億元），若果齋計街貨，建聯市值更加只得1億元咁大把。
股權歸邊 財政乾淨
咁樣睇，建聯大股東揸爆燈，市值唔大，絕對係搵殼人士心儀嘅目標，所以，若果建聯俾獨立第三者洽商賣盤，亦絕對唔覺得出奇。再講，建聯喺最底層，若果真係話有人斟，建聯要搞架構重組，一啲都唔複雜。
排除建聯賣盤呢個可能性，睇基本面，建聯到咗今年6月尾，手頭現金4.1億元，淨現金都講緊2.9億元，財政乾淨到痹，又唔計上年一筆1,702萬元嘅非現金性公平值收益，建聯今年半年度盈利，實際係增長咗25%，到3,040萬元。當下半年度盈利，同上半年睇齊，全年盈利約6,100萬元，建聯已經可以keep住4厘高息。
又喺嚟緊日子，建聯主打建築瓣數，繼續食住濠江酒店同賭場擴充計劃，再加埋側邊即將大興土木嘅橫琴島，建築行家有運行。而據有關當局估計，未來三年，橫琴將建2萬個住宅單位，又到咗今年9月，已登記企業195家，計劃投資額達至2,120億元。建聯食住澳門同橫琴發展計劃，亦可以長做長有。又呢期行家俊和（711）賣盤，家陣PB上到0.8倍，建聯以呢個PB水位做目標，現價（0.80元）講緊要升48%到1蚊。
錢雋
細價股專家
本欄逢周二、三、五刊出