隨住三子自首呼籲退場，後佔領時代已經來臨。而一場佔領運動，再次凸顯網上輿論同動員嘅重要性，所以泛民主派同華人民主書院嘅陶君行就合力搞咗個新網上平台「仙人掌」（ https://www.hkcactus.com），搶攻後佔領時代。
點解要叫「仙人掌」？據聞因為仙人掌係喺惡劣情況下生長，同泛民情況一樣，而且仙人掌有刺，一如佢哋咁，唔係純粹嘻嘻哈哈，仲會篤出政府不是之處。而呢個多媒體平台，唔只會做即時新聞，亦會網上進行直播，同時又有啲類似《100毛》嘅惡搞圖，亦會學《主場新聞》PO博客文章，據知《號外》主編張鐵志以及王丹都應承幫手寫文。名為《高達會客室》嘅訪談節目今日1點半啟播，由李永達訪問壹傳媒肥佬黎，為網台打響頭炮。